Santorini沙灘車遊島

係西西里島打工換宿後，正式進入我地旅程既第三個國家—希臘 Santorini Mykonos

Santorini主要由Oia同Fira兩個小鎮組成，Oia係平日睇相見到藍白小屋既地方，Fira則係另一個小鎮，相對Oia交通比較方便，多店鋪，餐廳住宿價錢亦相對比Oia低，所以大部分人都會選擇住Fira。島上景點距離比較遠，交通主要靠巴士，但巴士班次疏落又會誤點，所以唔少人都會選擇租車遊島。我地九月中去Santorini，溫差都幾大，晚上要著外套，記得準備充足衣服。

以下係4日3夜 Santorini行程表，俾大家有個大概印象先。

而係Santorini既洗費就係以下:

由Catania出發，羅馬轉機，03:55am我地終於到達Santorini機場。係機場等出Fira市區既第一班車，時間係7:20am。機場到Fira總站一程EUR1.8，上車購票，會有工作人員收錢，最好準備零錢，大紙難找錢。巴士沿途風景已令我地眼前一亮，太陽岩岩升起，一大片愛琴海係陽光照耀下閃閃發光。出發前一直覺得聖托里尼係知名旅遊地方，好怕被人過份吹奏，但當見到呢個畫面終於鬆一口氣，因為呢度真係好靚好靚。除左風景，另外亦非常佩服島上司機既駕駛技術，聖托里尼唔少景點都係山上，路途九曲十三灣，而且路窄，但司機駕駛大巴仍然不慌不亂，佩服！我地都講笑話司機係拓海，不停經過五連髮夾灣都輕輕鬆鬆。望望下風景就準備到站，我們住既地方係總站前一個站(總站係Fira市中心)，所以差唔多到我們就叫「有落」落車，係要自己叫的XD 民宿姨姨非常親切好人(好感動T^T因為意大利人相對粗魯，好耐無遇到親切既人)，因為見我係民宿既枱上狂訓，提早一小時就安排我地入住。安頓跟補眠之後，我地就行20-30分鐘左右路程去Fira市中心，第一站要先醫肚。

我地係一間叫Mama House既餐廳食，網上見有唔少台灣人推介，所以就想去試下，五點鐘餐廳客人已經好多。因為Santorini沿海，海鮮都特別出名，所以我點左一個魷魚桶EUR 10、Ho點左一個海鮮意粉EUR13，味道都不錯。我既魷魚桶裡面包左煮過的芝士、酸瓜、菜等等，我覺得幾香口特別👍🏻Ho既海鮮意粉意粉份量唔算多，但海鮮幾足料，都唔錯。呢間餐廳食物味道價錢都唔錯，CP值算幾高，只係侍應會有點唔耐煩，不過我地接受到，之後又去左一次XD

Mama House (click link to Tripadvisor)

地址: Main Square Fira, Fira 847 00, Greece

醫完肚就行街街，原本以為只有Oia既日落先吸引，所以沒想特別想睇FIra既日落，但當我地行行下，行出岸邊，即刻哇一聲，原來Fira日落都好靚，真係金黃色嫁個海，咁大個女第一次見咁靚日落。讚嘆完一輪再影完相後，我地繼續向山上行搵個更有利位置欣賞日落，太陽落山一刻大家都一齊拍手掌。宜家回想返，比起Oia，更加中意Fira睇日落既感覺，因為Oia實在太太太多人，無辦法似Fira可以安靜欣賞日落。睇完日落再到附近行下就行返酒店休息。

Fira日落,同美美日落影無聊相XD

進入本篇重點—沙灘車遊島

早上入住民宿俾錢時，我地見到民宿有代租沙灘車、電單車、普通汽車等。Ho只有國際汽車牌，但電單車牌仍是P牌階段。在路上我地有問過其他租車店，話無電單車牌不可以租沙灘車，建議我地租二人小車Smart，但我地覺得太貴之餘，又比較想試沙灘車，因為平時比較少見。好彩，民宿姨姨幫我地問左租車行話無電單車牌都可以租沙灘車，所以我地租左第二天既沙灘車。有唔同CC的沙灘車選擇，由50至250，我地租左150CC。租24小時EUR 30，油費自付，還車時要入返3格油。約好11點取車，車行會駕車到民宿，還車也係民宿還，非常方便。至於駕照方面，我地覺得如果想確保可以租沙灘車的話，都係申請國際電單車牌會比較好，因為唔係每一間都一定會租俾你，都要睇運氣。另外租車出發前，要確保車到你手上前無問題，最好影幾張相，因為有聽過話有不良車行會話車有損壞叫你賠錢的例子。第二日早上11點車行職員準時交車，他會先教你如何駕車，有問題都可以問。學完車我地就浩浩蕩蕩出發，我地既路線由Fira開始，途中會經過黑沙灘Kamari Beach及另一個黑沙灘Perissa，比較下邊個沙灘值得逗留，然後到燈塔，再返去沙灘玩水曬太陽，最後再到Oia睇日落。

去完黑沙灘到燈塔路上會有一處超靚海景我地停低影相

車路雖然好窄同不停上山落車轉灣再轉灣，其實都幾牙煙同危險，但我地依然好順利走過兩個沙灘。但就係前往燈塔路上，其中一段落斜失控炒左車...成架車剷上對面線石壆翻側... 好彩人無事，只係手腳有少少擦損，但真係嚇一大跳，又影響我地當下心情。好彩後尾仲識安慰自己講笑「人無事咪好囉，人無事先可以做到世界冠軍嫁嘛」。去到燈塔，我們已經無心情影相，之後就回程去沙灘，一路上都非常小心，每一個轉灣都減到好慢，好彩之後再無意外發生。事後上網睇返，原來好多人揸呢嫁ATV都出意外，好多人都建議唔好揸，所以大家都要考慮安全性，若果無信心都係揸返Smart遊島比較安全。

終於見到燈塔本人,但去到已無咩心情XD

之後都收拾返心情去沙灘，我們最後揀Kamari Beach因為覺得風景比較靚。我大大推薦Kamari Beach，因為真係好靚好Relax! 仲可以見到飛機係頭頂低空劃過！中間仲有個小島，好正！不過佢海入面係一塊地，長滿清苔，落水時要小心地滑。話明黑沙灘，沙是由一顆顆黑色粗沙組成。

租傘價錢EUR10，不過如果係餐廳消費滿EUR10可以免費用傘，我地當然叫埋野食，又可以食又可以訓:P 嘆完一輪心情終於好返點，又要繼續我地沙灘車之旅，由Kamari Beach揸去Oia，車程大概一小時。呢條路真係要好小心，好多急灣，加上上落山路特別斜，山上公路有部分路段亦無欄杆，所以真係要好小心！另外，建議大家最好早點到Oia，因為太遲到會難搵泊車位。最後平平安安趕係日落前到達Oia睇日落，呢度人山人海非常熱鬧。Oia既日落係直接落係海平面上，都真係幾靚，日落後依舊一齊拍掌吹口哨。