土耳其熱氣球秘景拍照

講起土耳其，好多人第一印象就係熱氣球，其實熱氣球係土耳其城市—Goreme , Cappadocia既熱門旅遊活動。

係Goreme小鎮既兩個清晨，我地都好早起左身，為既就係欣賞熱氣球浪漫日出！仲無意中發現左個秘景，都幾適合鍾意影相或者想靜靜欣賞日出既朋友。

呢個地方未必係最靚，因為有其他人都會搭車去遠少少山頂睇，但呢度因爲比較近酒店區，步行就可以到達。如果大家怕晨早又要搵車或者想訓多陣，真心推介呢個地方，因為依個位置睇既熱氣球景真係好靚。

（第一日睇既熱氣球,數量非常多)

另外，都建議大家可以係Goreme留兩日，一個早上用黎坐熱氣球，另一個早上就可以係地面上欣賞成個天空都係熱氣球既震撼畫面，順便影下靚相！

我地到達山洞酒店，第一時間就問左老闆去邊度睇熱氣球好，老闆行上酒店天台就睇到，時間係五點半至六點左右(酒店區大部分酒店都可以睇到熱氣球)。於是第二朝清晨，我地五點半就起身衝上天台，但咩都見唔到，仲以為老闆呃人:P 於是再較左六點半鬧鐘，但我一路訓唔著，六點左右去拉開窗簾睇睇，一打開窗簾，竟然就見到好多好多熱氣球已經係天上飛緊，成個畫面其實真係好夢幻! 於是即刻拍醒埋身邊個位，帶埋相機衝上天台影相。但酒店天台用肉眼睇就靚，可惜影相時會影到下面好多屋，環顧四周望到不遠處有個山頭，我地就話不如試下去個度睇。就行左過去，酒店行去只需10-15分鐘。不過提提大家最好都係著返波鞋，因為我地著拖鞋踩上山都幾辛苦，因為段山路有少少崎嶇。到達山頭，竟然一個人都無！因為我地都係著住訓覺衫求其加件外套就走出黎，所以我地今日靜靜地欣賞下個靚景就算，第二日先再黎同個景影相。第二日，我地六點就出發去秘景，不過今日熱氣球明顯無甘多，而且熱氣球位置都同琴日有少少唔同。不過係山頭睇都依然係好靚，同埋今日都係一個人都無，而且兩日沿途都唔見有其他旅客，所以我諗好少人會黎依個位置。基於人煙稀少既關係，大家上到去可以大影特影，又或者靜靜地欣賞靚景都無問題! 不過由於每日風向都唔同，所以熱氣球飛既位置都未必一樣，大家要留意返。以下係秘景位置既詳細資料：