埃及防騙趣事分享(上)

今次埃及之旅我地前後去左六日，我地以自由行方式旅遊。

去左總共4個城市，包括首都開羅、亞斯旺、樂蜀同吉薩。

我地極度建議若果打算會去亞斯旺同樂蜀既朋友唔好以自由行方式旅遊，跟旅行團絕對會比較安全及方便，因為呢2個地方交通比較唔方便，同埋環境落後。

其實係亞斯旺跟樂蜀，我地已經搵左Local Tour Guide，但仍然覺得非常不便，可能係我地搵既導遊安排不足。

以下分享一點埃及既防騙攻略、注意事項同一點旅途遇到既小趣事，雖然成個旅程都怕被騙，但宜家回想返都覺得幾好笑。

雖然話好多呃人既事件，但主要都係吉薩、樂蜀、亞斯旺發生，最後一日我地返到首都開羅即刻覺得正常好多，除左景點工作人員、司機同商人，基本上普通市民都好友善同肯幫人。

騙徒手法層出不窮(吉薩金字塔區)

1.係吉薩金字塔區，我地俾左門票錢，一入園區就有聲稱自己係職員既人同我地講話去金字塔一定要搭車先去到，唔係就要行15KM，同埋話會唔俾人。

當我地當時不停見其他遊客係身邊行過都無俾人截住，所以即刻問左附近一個遊客，佢話佢成個園區都係行路。聲稱自己係職員既人見俾我地拆穿，即刻話可以平價俾我地騎駱駝，當然之後我地無再理佢。

所以，注意去金字塔區並唔一定要搭車，你可以選擇行路(當然係炎熱天氣下係好辛苦)、搭車、騎馬或者騎駱駝。

2.入獅身人面像區時，會有人扮職員(又係戴住個牌)懶專業但又好求其甘介紹個地區，我地因為事前做過功課，又岩岩先差D被騙，所以馬上問係咪free of charge，個"職員"話係，因為我地買左飛。

去到獅身人面像前，個位人兄就好熱心地教我地擺姿勢，幫手影相。 我地開始覺得唔對路，就開始自己影相唔理佢，佢就問"Are you happy?"，跟住話"You have to give me something"，我地當然扮傻，佢即刻變面再話"You have to give me some money." 我地就話佢之前話唔洗錢，但佢竟然話只係講緊張ticket。 之後我地就廢事理佢，佢就死跟住我地，直到我地發火，佢就話叫我地Del左相佢，我地即刻仲嬲，大聲地同佢講我地唔需要佢service，同埋你話free of charge。

佢見引起其他人注意，佢就話叫我地走，仲話gogogo，再啤住我地咁走開去搵佢既同伴。

如果大家好需要有人指導同獅身人面像點影相，我覺得可以俾佢繼續教你幫你影，但我地就覺得佢影相技術好求其同埋動作亦唔係好新穎。 如果遇到呢D人，其實唔洗驚，可以選擇一開始就唔理佢同埋絕對唔好俾部相機佢幫你影相，又或者大聲少少同佢講野引起其他遊客注意就應該無問題。

3.我地由去埃及之前就已經好想騎駱駝遊金字塔，雖然係網上已經睇過好多唔同既騙法，但我地覺得難得去到都要騎下，所以去前已經傾好2個人加埋最多俾300埃磅。

去到吉薩金字塔居見到駱駝商人已經問清楚價錢，佢本身話400 2個人，我地講價講到300，話明連埋小費，大概騎一小時，包埋影相，咁我地就覺得都OK。

但當我地行完獅身人面像返去，佢竟然話300係兩個人，但只係騎一隻駱駝。我地當下真係覺得敗給他XD 聽到後，我地就話咁我地去另一間，佢話200兩隻駱騎，佢見狀即刻話好好好，俾兩隻我地。

上到駱駝騎左一陣，商人又暗示話如果中意D相就記得俾小費，但明明我地都講明價錢包左小費。不過最後，我地覺得D相都影得唔錯，個商人又都算幾有心，同埋天氣都好熱，佢拖住我地行都好辛苦，所以最後都俾左400埃磅。

所以如果騎駱駝記得問清楚時間、 幾多隻駱駝、會行邊幾個金字塔、包唔包影相、係美金定埃磅等等，但我覺得小費就唔洗係講價錢時講明，可以講價時講低D，最後覺得OK再俾小費。

同埋我地都好強力推介去到真係要騎下駱駝，唔好因為俾人呃就失去呢個體驗機會。

4.又係吉薩金字塔區，騎完駱駝我地係金字塔附近行下，突然有個人行埋黎問我地咩地方人，同我地傾左幾句就係佢個袋拎條頭巾話送俾我地，話唔洗錢。 我地已經醒水不停話唔洗，佢就塞左條頭巾俾我地就走左去。

我地個下真心以為終於遇到好人，但開心唔夠5秒，個人又返轉頭扮話教我地戴條頭巾，我地就唔停話唔洗。之後佢就問我地有無港幣可以俾佢，我地諗住算數拎D硬幣打發佢走，但佢竟然話佢要紙幣，之後我地見佢咁得寸進尺就直接唔理佢走人，佢就走開左。

其實會有咁多呢D騙人手法，其中一個原因相信都係因為遊客養成，大家怕麻煩就俾錢打發佢地。另一個原因就可能因為埃及經濟真係好差，佢地迫於無奈先會咁。 其實係開羅都有熱心幫助我地既路人，但去其他地區真係要小心唔好亂走同輕易信人。

之後會再分享其他關於埃及既趣事同注意事項，當然唔少得行程洗費資料，有興趣就繼續留意我地。