五千蚊玩轉土耳其9日8夜詳細分享(上)

今次去土耳其前後共9日8夜，總共去左4個地方，包括Istanbul、Goreme、Fethiye、Pamukkale。交通我地主要靠夜巴移動，可以節省酒店錢之餘又唔會浪費日間時間，而且土耳其巴士出名係舒服，座位都比較寬敞。去左9日8夜，唔連機票兩人用左9千蚊唔夠，但有好多唔同體驗同玩樂。去完覺得呢個地方CP值好高，好想推薦俾大家!! 因為內容太長太多，所以會分上下兩篇分享。

一講土耳其，好多人都會擔心治安問題，但其實我覺得治安並無想像中咁差。一到步其實已經覺得好放心，因為街道都好乾淨，建築交通各樣都好似幾先進。去完咁多日，都無一刻係覺得危險或者唔安全。

不過女仔就要注意返衣著，因為始終係伊斯蘭國家，當地人衣著都比較保守，入鄉隨俗，去到當地最好都係著返長褲。唔係既話，可能會引起周圍目光令到自己唔舒服。另外，土耳其男人都係比較熱情同口花花，如果淨係女仔自己去就留意返：）

開始前都係介紹返行程同洗費俾個初步概念大家！

行程：

洗費：(匯率約 1 TRY = 2.13639 HKD)

Day 1

第一日，因為訓完一晚機場太攰，我地返酒店就休息到晚上落街行下食下飯。因為我地酒店係藍色清真寺附近，所以都當熱鬧同多餐廳。食完周圍睇下，發現土耳其物價都算偏低，M記廿幾蚊一個餐，starbucks 三十幾蚊一杯，不過我地試過都係香港好飲好多:P 同埋食飯基本上都係四、五十蚊搞掂。

Day 2

第二日，起身食個早餐飲杯starbucks，我地就去左行大巴托市集，係藍色清真寺附近，大概行廿分鐘就到。

市集入面有好多唔同既土耳其特色物品買，我地就買左d民族服裝。

土耳其碗碟好靚：）

之後我地一行出市集大街，就發現個度既野平過市集內好多，雖然我地搵唔到有我地買個d衫(好彩:P)。所以提提大家，可以先行市集大街再行市集裡面。

行完街就去食飯，食左我地第一餐既燒肉！好好味啊燒雞翼！而且價錢好平，只係18TL咋～不過之後已經開始食厭...土耳其好似得呢D kebap飯食:(

食完飯我地就去左遊船河，可以坐係船上遊覽下Istanbul既風景都唔錯。係google map search Bosphorus Cruise 就會搵到，行到附近應該會見到上船位置。 12TL 一個人，一轉都成個幾鐘，中間有個位有好多海鷗好壯觀。

船河完我地順便去左藍色清真寺，之後就返酒店準備搭夜巴去Goreme，建議大家可以係酒店附近搵travel agency幫手買飛。唔洗自己特登去車站買飛之餘，仲可以問下可唔可以連埋接送去車站。我地訂個間就係會連埋接去車站個程，方便好多，唔洗自己拖行李搭車去車站，有人會黎車你去。最重要係只係比原先票價貴5TL，如果自己搭車去車站可能都差唔多車費。另外留意返通常去Goreme既車都會中間轉一程小巴，係巴士公司提供埋既接駁。

Day 3

第三日早上我地就到Goreme，酒店有車接我地上去，到酒店後老闆就介紹左唔同既tour俾我地，仲俾我地提早check in入房休息。當日我地去左Open-air museum同join左個atv遊奇石林既tour。

Open-air museum係老闆車我地去，我地都係入去行左一陣，睇左幾個教堂。如果中意了解基督教歷史都可以黎下，因為個度係以前基督徒走難去既地方。門票30TL一個人。

之後就到重頭戲，沙灘車遊奇石林，因為之前希臘揸過炒車後都有少少陰影，但估唔到呢度仲刺激XD 呢度既路更加崎嶇不平，領隊又會叫你係一個45度大斜坡直衝落去，刺激過玩過山車XD

領隊會帶大隊去唔同既山谷停底，俾時間大家影相，最後再睇日落，然後回程。其實我地都無咩點影相，但覺得揸車既過程幾好玩幾刺激，所以都幾中意呢個行程。

Day 4

第四日，一朝早起身睇日出加熱氣球，去左一個秘景欣賞，詳情可以睇返呢篇https://goo.gl/CzJR4U。之後就參加green tour，成個tour 9點至6點，包埋午餐。成個tour主要係帶你睇不同地下城、奇石林同峽谷健行(會有小溪休息)、最尾會帶你去睇寶石工場，睇下有無興趣買，全日行程最中意係地下城同最尾小溪。詳情上網睇都有好多Green Tour行程資料，大部分都大同小異，因為我都唔太記得XD

地下城係參觀以前基督徒躲避阿拉伯人追殺既居住地方。我覺得幾得意，因為係地下好深既地方，好難想像當時佢地點生活，同時亦會好佩服人類智慧，係甘惡劣既環境下，佢地都可以設計唔同既方法令自己生存到。

其他行程我地都係落車望下影下相，無咩覺得好靚或者好特別，但覺得整體黎講一日tour呢個價錢其實好抵。

(因為呢日既相片因為電腦有問題無哂:( 無辦法分享照片)

晚上，我地就去左土耳其浴，係一個幾得意既體驗。換完衫後，有個阿姨會幫你搽泥面膜，之後就去焗15分鐘桑拿。之後沖涼，有另一個阿姨就會帶你去個浴場，浴場中間有一大塊大理石台，阿姨會叫你訓底，之後開始用一塊類似沙紙幫你擦全身，然後沖身。沖身後阿姨就開始做泡泡浴加按摩。成個過程大概15分鐘，其實我覺得唔係特別舒服，純粹當作體驗不錯。

Day 5

第五日朝早我地都係起身睇熱氣球加影下相，下午再去行下街，俾我地搵到一間超平既手信店！

超平手信店地址在一間叫Nazar Borek Ve Gozleme的店附近，可以用Google map search。

手信店外貌