享受冰島免費全天然秘景小溪溫泉(大推!!)
講起冰島溫泉，好多人會第一時間諗起The Blue Lagoon，一個幾乎每個去冰島既旅客都會去既溫泉。但其實除此之外，冰島重有以下兩個值得去既溫泉，可以因應自己喜好同預算去選擇！ Blue Lagoon價錢比較貴，而且問過朋友意見都話覺得泉水溫度唔太夠熱。對於純粹想係寒冷天氣下浸住溫暖泉水休息既我地並唔係最合適既選擇。 於是我地就上網做資料搜集，最後旅程中去左兩個溫泉—Secret Lagoon 同天然小溪溫泉Reykjadalur Hot Spring Thermal River。 其實兩個溫泉我地都好鍾意，而且係兩個不同既體驗！文末都會介紹下Secret Lagoon。 進入本篇重點推介—Reykjadalur小溪溫泉 雖然呢個係要行山先可以去到既溫泉，但路線並唔困難，只有幾段小路比較斜，途中都好多一家大細行；而且沿途風景都好靚，單程行山時間大約一小時，大大推介俾鍾意行山又想體驗天然溫泉既朋友！
小溪中間有木板橋，冬天會輕微結霜，步行時小心地滑
長長的溫泉溪流
唔少人中意呢個微暖區域
回程山路日落
山路係泥石路
小溪並唔小，係一條長長既河流，唔同位置有唔同溫度，部份區域會熱到彈返起身，有部分就熱度岩岩好，只要揀岩適合自己溫度既位置，係寒冷天氣下浸住真係超級舒服。泉底係泥石地，移動時要小心小石頭。
泉底係泥石 移動時小心
因為係天然溫泉唔會有任何物品提供，所以大家記得帶齊毛巾、泳衣同所需物品，浸前浸後都無得沖涼。換衫亦只有幾塊隔版遮掩，要同朋友互相幫忙換衫，哈哈。
有隔版遮掩 可以換衫
我地浸左大約一個半小時，因為要趕回程巴士，所以無得繼續浸，另外一齊黎既朋友決定繼續再浸，因為真係好舒服。附近環境係好寧靜既山景，一路傾住計一路享受全天然既溫泉，時間真係會過得好快。大家想浸耐D，就記得早點出發！ 小溪溫泉只係距離冰島市區Reykjavik大約45分鐘車程可以到達小溪市鎮Hverageroi，自駕的朋友非常方便，但注意車係不能上山路，所以任何交通工具都需要係山腳再行約一小時既山路先可以到達小溪。
自駕的朋友只需要導航到Reykjadalur Hot Spring Thermal River就可以，地圖附近會見到停車場同Hot River Coffee。
山腳會有停車場可以泊車
山腳停車場附近有間cafe
除左自駕到達小溪外，巴士亦可以到達，落車後要再行45分鐘先可以到達山腳。而我地就係搭巴士去小溪既，雖然腳程較遠，但覺得可以接受，而且去到溫泉就會覺得好值得。 以下係巴士路線及費用： 強烈建議下載Straeto app，方便查車班次及路線！
另外提提大家市內巴士購票需到指定購票站(可上Straeto bus官網查看)或透過app用信用卡購票(但需要冰島電話驗證碼驗證戶口，可請民宿員工幫忙)。 我地係用App購票，購票後會有activate既按鈕，只需要上車前禁，上車show俾司機睇就可以，注意上車前先好禁activate，因為禁左一小時就會失效。 而市外巴士可以上車同司機講邊個站落車，直接用信用卡俾錢就可以。 因為我地住市中心，所以係Bsi上車再搭市內巴士3號線，所有市內巴士無論幾多站都係收費一程ISK440，大家可以根據自己住宿位置搜尋上車站或路線，總之要係Mjodd落車。 係Mjodd站落車後，轉搭51或52號巴士係Hverageroi - Shell站落車，車費單程ISK1320，市外巴士根據站數收費。 去程總共ISK1760。 回程照行返Hverageroi - Shell搭51或52號回Mjodd，一樣係ISK1320，注意上車時巴士司機會俾轉乘卷，記得要收好，一陣轉搭市內可以免費乘搭，如果好似我地一樣返市中心就照搭3號線就可以了。 (所以如用App買市內巴士飛，只需買一程就夠，唔好好似我地傻傻地買來回T^T，或者要用先買，我地因為無network先要一次過買) 因為回程市內免費轉乘，所以回程只需ISK1320。 來回只需約HKD230就可以享有一次免費天然溫泉體驗，係物價超昂貴既冰島黎講，簡直係超值得！成功靠自己搭巴士再行山去到小溪都令我地勁有成功感！哈哈！ Hverageroi - Shell站落車後，我地照住Google Map search "Reykjadalur Hot Spring Thermal River" 路線行，記住只要跟住車路旁邊行人路行就可以，唔好兜遠左。只要見到停車場同cafe就證明你成功到達山腳，可以開始登山！ 我地上網有見過有一日團可以去呢個小溪溫泉(一樣要自己行山)，但差唔多要1000港元，比較唔建議。因為自駕好方便，搭巴士亦OK! 另外一個溫泉—Secret Lagoon
(網絡圖片)
(網絡圖片)
呢個就係比較傳統有工作人員管理既天然溫泉，有更衣室、沖涼、毛巾等用品提供。 門票價錢亦非常便宜，大人只需ISK2800、67歲以上ISK1400、14歲以下小朋友免費。 毛巾、泳衣租借各ISK500。 溫泉得一個池，唔算好大，但泉水都夠熱幾舒服。另外有提供浮棒可以用，亦有飲品可以購買。如果唔想行山路，Secret Lagoon絕對係一個好選擇，價錢便宜又不過不失，CP值好高 但呢個溫泉交通比較唔方便，自駕從市區需時約一個半小時。搭巴士應該可以去到，但唔知要行幾耐同埋Secret Lagoon溫泉官網都唔建議搭巴士去。 而我地自己就係join黃金圈既一日團包埋既，搜集資料時都見好多travel agency有呢個團提供，行完一日黃金圈最尾浸溫泉非常舒服！呢個係我地當時join既團係呢個http://cn.guidetoiceland.is/book-holiday-trips/golden-circle-the-secret-lagoon，但好似有更便宜既選擇，大家可以搵一搵。
最後，真係十分建議大家冬天去冰島一定要試浸溫泉，因為真係好舒服好舒服！
